Një nga revistat më prestigjioze për mjekësi në Bullgari “Forum Medikus” zhvilloi konkursin e saj vjetor. Sivjet çmimi iu shpërnda ekipit të Klinikës së Neurokirurgjisë në spitalin universitar “Shën Ivan i Rilës” në Sofje. Në vit në klinikë bëhen më se 2000 ndërhyrje të vështira kirurgjike, p.sh. operacionet e tumorit të trurit.

Në krye të klinikës është prof. Marin Marinov, i cili sqaron: “Klinika është pajisur me aparaturën më moderne në Bullgari. Më se 70 vjet klinika jep kontributin e saj në neurokirurgjinë vendase. Këtu shpërndahen certifikatat e të gjithë neurokirurgëve bullgarë. Standardi është shumë i lartë. Në klinikë specializojnë studentë nga mbarë bota. Stafi është 120 anëtarësh – mjekë, infermiere dhe sanitarë. Një e treta e ndërhyrjeve të neurokirurgjisë në Bullgari bëhen në këtë klinikë. E merituam çmimin falë metodave të reja të mjekimit të sëmundjeve neurokirurgjike, si p.sh. të epilepsivetë cilat u rezistojnë barnave dhe stimulimit të trurit tek sëmundja Parkinson. Sivjet fituam edhe një konkurs tjetër – për ndërtimin e një salle operacioni të teknologjisë së lartë.”

A disponon klinika me numër të mjaftueshëm mjekësh? Dihet se gjithnjë e më shumë mjekë të rinj emigrojnë.

“Nga stafi ynë ka vetëm dy mjekë të cilët aktualisht punojnë në Gjermani dhe Angli – thotë prof. Marinov. – Për fat të mirë, ata realizohen në mënyrë të suksesshme, por nuk mund të flitet për ndonjë tendencë. Në përgjithësi në Bullgari shumë mjekë të rinj largohen nga vendi për shkak të problemeve te specializimit të hershëm. Unë jam po ashtu dhe dekan i Fakultetit të Mjekësisë dhe përgjigjem drejtpërsëdrejti për realizimin e mjekëve të rinj, të cilët sapo kanë mbaruar fakultetin. Faktet janë mjaft shqetësuese. Shumë nga studentët dëshirojnë të shkojnë jashtë shtetit për të filluar menjëherë specializim. Bullgaria është anëtare e BE-së dhe tregu i punës evropian është i hapur për bullgarët. Kështu që ne nuk mund t’i stopojmë këta njerëz për të provuar fatin e tyre në vendet e tjera të Evropës. Disa prej tyre rikthehen në Bullgari, por numri i tyre nuk është i konsiderueshëm.”

Përgatiti në shqip: Anna Kapitanova