Sot në kryeqytetin bullgar, Sofje mbahet Parada e Vullnetarëve, e cila paradë është e para për nga lloji i saj. Shoqata Kombëtare “Diabeti, para diabetit dhe sindroma metabolike” e organizon këtë aktivitet sipas projektit “Jeto guximshëm, jeto pa frikë” të Programit Kombëtar të Rinisë. Ky i fundit e financon paradën. Vullnetarët bëjnë prezantime, punishte, ekspozita me fotografi, fushata interaktive etj.

“Na vjen mirë se shumë të rinj u treguan vullnetarë duke u përfshirë në organizata të ndryshme joqeveritare – rrëfen znj. Radost Radanova, shefe e Programit Kombëtar të Rinisë pranë Qendrës Rinore të Programeve dhe Nismave Evropiane. – Në këto programe të rinjtë fitojnë përvojë të madhe dhe në një farë mënyre përfshihen në arsimin joformal. Ky i fundit është shumë i rëndësishëm si organ financiar. Vitin e kaluar u financuan më se 40 projekte të vullnetarëve nga mbarë Bullgaria. Vërehet tendenca e numrit më të madh të femrave në krahasim me meshkujt. Kemi për qëllim të përfshijmë meshkujt e moshës nga 18 deri në 29 vjeç në më shumë aktivitete vullnetare. Vitin e kaluar kemi shpërndarë rreth 41 mijë euro. Organizatat vullnetare janë mjaft aktive, punojnë shumë dhe interesi për to është i madh. Më vjen mirë po ashtu se ka përfaqësues të organizatave nga vendbanimet e vogla. Çdo vullnetar merr certifikatë për njohuritë e fituara. Kjo gjë është me shumë rëndësi për ne, sepse punohet goxha në njohjen e arsimit joformal. Ky i fundit mund të jetë i dobishëm për punëdhënës dhe shkolla të veçanta, ku të merret parasysh përvoja e fituar nga vullnetarët.”

Sipas një analize të Aleancës Kombëtare të Punës me Vullnetarët, më se 50% e të rinjve, të cilët kanë marrë pjesë në aktivitete vullnetare, u bashkohen atyre për të ndihmuar njerëzit. Rreth 40% prej vullnetarëve kanë treguar interes privat për këto aktivitete – qoftë lidhur me ekologjinë, qoftë me shëndetin etj. Për 20% të të anketuarve motivi i vullnetarizmit ka të bëjë me dëshirën e tyre për të shkëmbyer përvojë sociale, për të lidhur shoqëri të reja dhe për të krijuar kontakte të dobishme.

Përgatiti në shqip: Anna Kapitanova