Krijues të njohur bullgarë janë në thelbin e ekspozitës “Portrete” të rregulluar në Sallën “Sredec” të Ministrisë së Kulturës. Njerëzit, që janë të rikrijuar mbi tablotë, janë bashkëkohës të piktorit të njohur Nikollaj Janakiev. Në portretet mund të shihen këngëtarja operistike me famë botërore Gena Dimitrova, poeti i mrekullueshëm dhe përkthyes i përsosur Valeri Petrov, artistja Tatjana Llolova, dramaturgu Stanisllav Stratiev, piktorët Genko Genkov, Emill Stojçev, Svetlin Rusev dhe shumë krijues të tjerë bullgarë. Ekspozita përbën një përulje origjinale para talentit dhe kontributit të këtyre njerëzve për zhvillimin e kulturës bullgare.

“Pata fatin e bardhë të takohem me secilin prej këtyre krijuesve. Komunikimi me njerëz të tillë gjithnjë lë mbresa të thella – tregon Nikollaj Janakiev. – Prandaj vendosa të pikturoj portrete të secilit prej tyre. Disa prej portreteve fillova të bëj menjëherë pas mbarimit të Akademisë së Arteve Figurative, të tjerë – i krijova tani. Në fakt, prej kohe kam një ide të rregulloj një ekspozitë të tillë dhe gëzohem, se ajo më në fund u realizua. Mendoj, se hapësira e kësaj galerie është tepër e përshtatshme për prezantimin e portreteve të krijuesve të ndryshëm.”

Cilat janë sfidat, kur piktori krijon një portret? Çfarë janë përgjegjësitë e tij?

“Në portretet piktori duhet të rikrijojë karakterin e modelit. Krahas kësaj ai duhet të shfaqë edhe qëndrimin e tij ndaj këtij njeriu. Në çdo portret u përpoqa të shpreh qëndrimin tim individual. Mendoj, se e kam arritur, sepse portretet dallohen nga njeri tjetri. Dhe kjo është e natyrshme pasi ata janë njerëz të ndryshëm me karaktere të ndryshme. Desha të zbuloj origjinalitetin e secilit prej këtyre krijuesve.”

Si e caktoni mënyrën tuaj të pikturimit?

“Posaçërisht në portretet përpiqem të kap gjendjen e brendshme shpirtërore të njeriut, të cilin e pikturoj. Ja, për shembull portretin e piktorit Georgi Trifonov e krijova në bardhë dhe zi dhe ky kompozim ishte karakteristik për të. Ai ishte një piktor i mrekullueshëm me imagjinatë jo të zakontë. Në këtë tablo të madhe u përpoqa të prezantoj botën e tij. E bëra aq sa munda.”

Piktori Nikollaj Janakiev për herë të parë rregullon një ekspozitë me portrete. Tablo të tij janë pronë të Galerisë Kombëtare të Arteve Figurative dhe të Galerisë së Arteve Figurative të Sofjes, si dhe të pothuajse të gjitha galerive të qyteteve të vendit. Ai ka prezantuar ekspozita me vete jo vetëm në Sofje dhe në qytetet e tjera bullgare, por edhe në Luksemburg, Zvicër, Gjerman, Itali, Izrael, Francë, Austri, Sllovaki, Poloni, Finlandë, SHBA-në, Maltë, Siri, Qipro... Vepra të piktorit u paraqitën në ekspozita të ndryshme ndërkombëtare në Evropë, në Amerikë, në Azi.

Piktori Nikollaj Janakiev tashmë ka ftesë për Festat e Arteve “Apolonija” në Sozopoll, ku do të prezantojë një pjesë prej portreteve. Krahas kësaj do të marrë pjesë në Festivalin Kinematografik “Dashuria është çmenduri” në Varnë. Më 4 shtator bashkë me kolegun dhe mik të tij Vasill Stoev do të hapë një ekspozitë në një pallat të vjetër në Ljubljana.

Përgatiti në shqip: Svetllana Dimitrova