Presioni i klandestinëve dhe sulmet kibernetike janë ndër kërcënimet më të mëdha për sigurinë e shtetit tonë. Ky është përfundimi i mbledhjes së Këshillit Konsultativ për Siguri Kombëtare pranë Presidentit, “kushtuar ndryshimeve në mjedisin gjeostrategjik dhe rreziqeve që sjellin këto ndryshime” për Bullgarinë. Në praninë e kryetares së Kuvendit Cecka Caçeva, kryeministrit Bojko Borisov, udhëheqësve të grupeve parlamentare u dëgjuan drejtorët e Shërbimit Hetues  dhe të Shërbimit “Informacion Ushtarak”, kështu edhe ministrat e punëve të brendshme dhe të punëve të jashtme. Pas 5 orësh të bisedimeve u mor vendimi për përpilimin e një plani për veprim në situata krizash. Situata të tilla mund të shkaktohen nga kërcënime eventuale terroriste në Evropë, nga radikalizim i minoriteteve në shtetet fqinje dhe nga një fluks i përforcuar refugjatësh.

“Sfida më e madhe para sigurisë kombëtare janë valat ilegale të refugjatëve. Pas masave që do të ndërmarrin disa shtete evropiane fluksi ndaj Bullgarisë mund të zgjerohet.” – tha lideri i Organizatës së Brendshme Revolucionare Maqedonase Krasimir Karakaçanov.

Në fund të konsultimeve presidenti Rosen Plevneliev tha:

“Më i drejtpërdrejti dhe më aktual për shtetin tonë (pa nënvlerësuar të gjitha rreziqet e tjera) është rreziku nga rritja e fluksit të refugjatëve ndaj dhe përmes Bullgarisë. Situata mund të keqësohet për shkak të pamundësisë së Evropës që të mbrojë efektivisht kufijtë e veta të jashtme, të hartojë rregulla të përbashkëta për zgjidhje të drejtë të problemit të migracionit dhe të ndihmojë për evitimin e arsyeve për krizën e refugjatëve. Rreziku nga veprime terroriste në Evropë rritet për arsye të radikalizimit të grupeve të ndryshme shoqërore – kryesisht në shtetet e Evropës Perëndimore. Ky është një problem i ri dhe shumë serioz për kontinentin tonë. Shumë shtetas evropianë marrin pjesë në luftërat në Afrikë në anën e Shtetit Islamik ose të grupazheve të tjera terroriste. Ata sjellin përvojën dhe idetë e tyre radikale në shtetet e lindjes së tyre dhe kështu kërcënimet për shoqëritë perëndimore rriten shumë. Në lidhje me këtë institucionet bullgare duhet të ndërmarrin masa mjaft efektive për parandalimin e zhvillimit të proceseve të tilla tek ne.”

“Bullgaria është shumë e vogël në sfondin e proceseve gjeopolitike, për të cilat po flasim, për ngjarjet në Afrikën Veriore dhe në Lindjen e Mesme. Mirëpo Bullgaria ka një vend strategjik nga pikëpamja gjeopolitike  – diçka që mund të provokojë shqetësime dhe kërcënime potenciale gjatë muajve dhe viteve të ardhshme. Për të gjithët është e qartë se konflikti në Lindjen e Mesme nuk do të përfundojë në kuadrin e muajve të ardhshme dhe mund të vazhdojë disa vite me radhë. Për këtë arsye flasim për marrëdhëniet tona të fqinjësisë së mirë me fqinjët tanë” – tha para mikrofonit të Radio Bullgarisë lideri i Grupit Parlamentar të partisë GERB Cvetan Cvetanov.

Politikanët vendosën se në nivel evropian Bullgaria duhet të insistojë për zgjerimin e zonës së sigurisë të BE-së.

“Jo me anë të mbylljes së Evropës, por me anë të zgjerimit të zonës së sigurisë të BE-së – kjo do të thotë zgjerim të kufijve të BE-së, tha lideri i Lëvizjes për të Drejtat dhe Liritë Ljutvi Mestan pas mbledhjes së Këshillit Konsultativ për Siguri Kombëtare. Kam parasysh integrimin e Ballkanit Perëndimor dhe zgjerimin e BE-së në drejtim lindore. Propozimi ynë është që Bullgaria të punojë më efiktivisht për arritjen e një pozite unike të BE-së për zgjerimin e zonës së sigurisë të BE-së ndërmjet përshpejtimit të procesit të integrimit të Ballkanit Perëndimor në BE në kushtet e respektimit të interesit kombëtar bullgar dhe të respektimit të kritereve për anëtarësim.”

Një hallkë e dobët në sistemin e sigurisë është gjithashtu terrorizmi kibernetik – është shkruar në dokumentin përfundimtar të Këshillit Konsultativ për Siguri Kombëtare, të prezantuar nga presidenti Plevneliev:

“Në fund të tetorit, në kushtet të procesit zgjedhor, u bëmë dëshmitarë të sulmit më të madh kibernetik kundër Bullgarisë. Fakti se ai ishte bërë në ditën e zgjedhjeve dhe referendumit tregon se ai ka qëllim të qartë dhe se është provokacion ndaj shoqërisë dhe shtetit. Sulmet në sajtet e shumë institucioneve bullgare vështirësuan punën e tyre dhe janë indikator i qartë për përmasat e rrezikut. Ky është një rrezik i ri që ka nevojë për analizë të thelluar dhe për përpunimin e masave mjaft efektive të kundërvënies. Këtu duhet të përdorim përvojën e shërbimeve partnere të sigurisë. Kemi nevojë edhe për masa legjislative dhe për kuadro mjaft të përgatitura në këtë fushë. Duhet të investojmë në siguri dhe në mbrojtje. Vetëm me ndihmën e partnerëve tanë nga shtetet e tjera demokratike mund t’i përballojmë sfidat para nesh.”

Përgatiti në shqip: Jordanka Ivanova