Para kohe Agjencia Shtetërore “Arkiva” hapi një ekspozitë “Ekspresionizmi. Vallëzimi i përjetshëm i jetës”. Ideja u inspirua nga përvjetori i 150-të i piktorit të njohur norvegjez Edvard Munk. Do të kujtojmë, se vepra e tij “Britma” është një nga tablotë më të njohura dhe më të shtrenjta të artit ekspresionist në botë. Motoja e ekspozitës u huazua nga cikli i tij “Larimi i jetës”. Stili i quajtur ekspresionizëm lindi në fillim të shekullit XX. Si rezultat u krijuan vepra të forta të paharrueshme në artin dhe letërsinë evropiane.

Projekti ka të bëjë me ndikimin e ekspresionizmit mbi piktorët bullgarë – si gjatë shekullit të kaluar, ashtu edhe sot. Ekspozita u rregullua me ndihmën e Mekanizmit Financiar Norvegjez. Nisma ka për qëllim të prezantojë vlerat kulturore të Fondit Kombëtar Arkivor nëpërmjet ekspozitave dhe veprimtarive të ndryshme shoqëruese. Në një intervistë për Radio Bullgarinë udhëheqësja e projektit dhe eksperte në Agjencinë Shtetërore “Arkiva” Natasha Dimçeva tregon:

“Që në fillim të shekullit XX me formimin e ekspresionizmit si një drejtim krijues shumë piktorë bullgarë u pasionuan nga ky stil dhe nga temat e tij. Trajtimi i fortë dhe emocional i vuajtjes që haset në krijimtarinë e piktorit Edvard Munk ndikoi mbi zhvillimin e ekspresionizmit – një nga drejtimet më të fuqishme sociale dhe politike në artin botëror. Krijimtaria e tij është një burim i frymëzimit dhe shkak për rimendim të përhershëm tënatyrës njerëzore.”

Sot Agjencia Shtetërore “Arkiva” ruan një sërë fondesh personale të piktorëve bullgarë me veprat dhe me arkivat e tyre. Ekspozita iu kushtohet kontributit amtarë në ekspresionizmin. Në Arkivat Shtetërore ruhen veprat e piktorëve të tillë të njohur si Asen Vasilev, Ivan Milev, Bistra Vinarova, Zlatju Bojaxhiev, Ivan Nenov, Sirak Skitnik, Aleksandër Dobrinov e shumë të tjerë – të gjithë ata krijues, tablotë e të cilëve janë të ndikuara nga stili dhe temat e ekspresionizmit. Ekspozita përbën dhe një urë drejt brezit të ri në artin bullgar të pikturimit.

“Posaçërisht për projekt u ftuan në një simpozium piktorë të rinj, të cilët krijuan tablo jashtëzakonisht të bukura dhe të paharrueshme – thekson zonja Natasha Dimçeva. – Piktorët janë Ema Vankova, Nora Ampova, Kalija Kallëçeva, Tereza Zikopullu, Radosllav Dimitrov-Badulija. Ata krijuan vepra të mrekullueshme dhe me gëzim të madh vizituesit do t’i kënaqen kësaj vazhdimësie në artin e krijuesve të rinj bullgarë.”

Përgatiti në shqip: Svetllana Dimitrova

Fotografi nga ekspozita: Veneta Pavllova