Më 25 prill Radioja Kombëtare Bullgare mblodhi në një skenë në Studion e vetë të parë muzikantët më të mirë të konkursit të 48-të me radhë “Pranvera 2017” për muzikë të re pop dhe rock. Në juri morën pjesë muzikantë të dalluar dhe gazetarë nga radioja jonë.

Ideja e këtij konkursi, i cili pas dy vjetësh do të shënojë jubileun e vet të 50 vjetorit, është t’i stimulojë muzikantët e skenës sonë që të krijojnë muzikë të re, të zhvillojnë potencialin e tyre si kompozitorë dhe si autorë tekstesh, si aranzhues dhe si këngëtarë. Çmimin e parë e mori një bandë, mjaft e njohur dhe e adhuruar – “Sleng”. Pas vdekjes së papritur të vokalistit të saj Dimitër Ekimov para 10 vjetësh, për një periudhë kohe “Sleng” ndërpreu punë. Tani grupi ka një vokalist të ri – Vlladimir Mihajllov, i njohur me pjesëmarrjen e tij në një bandë tjetër – “Safo”. Tani “Sleng” dhe kënga “Gjëra të pamundshme” zë vendin e parë në edicionin e 48-të të konkursit për këngë të reja pop dhe rock “Pranvera 2017”.

Kënga e cila zuri pozitën e dytë është kompozuar nga një grup tjetër i njohur – P.I.F. Muzikantët e tij gjithashtu mund të lëvdohen me një karrierë të frytshme me disa albume dhe me veprimtari aktive koncertore. Tani ata prezantohen me këngën e tyre “Foleja”. Autori i muzikës dhe tekstit është vokalisti i formacionit Dimo Stojanov.

Sipas traditës konkursi “Pranvera 2017” u ofroi mundësi dëgjuesve të Radios Kombëtare Bullgare që të zgjedhin këngën e tyre më të preferuar. Më shumë vota mblodhi kënga “Mëngjesi” në ekzekutim të këngëtares Teodora Radillova. Autori i tekstit, muzikës dhe aranzhimit është Mihaill Nedkov.

Çdo vit Radioja Kombëtare Bullgare fton muzikantë të njohur bullgarë për të dhënë votën e tyre për një nga këngët e zgjedhura në kuadrin e festivalit për muzikë të re pop dhe rock. Ky është çmimi i muzikantëve dhe specialistëve. Sivjet atë e mori këngëtari i ri Javor Vellçev – Javi për këngën “Gravitation”.

Zakonisht Radioja Kombëtare Bullgare jep një çmim të posaçëm në konkursin për muzikë të re bullgare. Ky është një koncert vetjak në një nga skenat e festivalit në Groningen, Holandë. Deri tani atje janë prezantuar bullgarët nga bandat “Der Hunds”, të cilët fituan çmimin e vitit të kaluar, kështu edhe muzikantët nga D2, B.T.R dhe Gravity Co. Sivjet çmimin më të pritur e mori “Saint Electrics" për këngën “Locket in this town”. Muzika dhe aranzhimi i përkasin formacionit “Saint Electrics“, autori i tekstit është Grisha Georgiev. Kështu që po presim pjesëmarrjen e “Saint Electrics“-it në Groningen, Holandë, në dimrin e vitit 2018.

Përgatiti në shqip: Jordanka Ivanova

Fotografi: Ani Petrova