Mjekët nga “Pirogov” bllokuan bulevardin “Car Boris III” në Sofje. Ata protestuan në mbështetje të Prof. Asen Balltov, i cili u hoq nga posti i drejtorit. Kreu i spitalit më të madh të urgjencës në vend është akuzuar për shkelje financiare pas një inspektimi nga Fondi Kombëtar i Sigurimeve Shëndetësore.

Balltov sfidoi në gjykatë të dhënat nga inspektimet dhe tha se drejtori i fondit Petko Sallçev po ushtron presion mbi spitalet në vend. “Pirogov” nuk abuzon me mjetet e fondit, por i trajton pacientët pa marrë parasysh sa sa i kushton spitalit mjekimi i tyre. Nuk ka asnjë pacient fiktiv. Të gjithë pacientët janë trajtuar në kuadrin e shtegut shëndetësor për Covid-19. Trajtimi është kryer falas dhe njerëzit nuk kanë paguar asnjë stotinka, tha Balltov.

"Në protokollet shihet se ka një aktivitet të raportuar, por të parealizuar të më shumë se 400 personave për mbi 1 milion leva (500 mijë euro). Shumica e tyre janë diagnostikuar me cirrozë të mëlçisë dhe dështim kronik të veshkave", u përgjigj Ministria e Shëndetësisë. Në mënyrë të rastësishme Fondi Kombëtar i Sigurimeve Shëndetësore ka kryer një sondazh në mesin e një pjese të "të sëmurëve" të cilët kanë thënë se nuk janë trajtuar në spital. Për një pjesë tjetër të "të sëmurëve" është konstatuar se janë pjesë e stafit të spitalit dhe gjatë "trajtimit" kanë qenë në punë në spital, sipas orarit të punës.