Shtetet e Bashkuara janë të gatshme të ndajnë 1.5 miliardë dollarë në muaj për qeverinë ukrainase në 4-5 muajt e ardhshëm, tha Zëvendës Sekretari i Parë i Shtetit për Çështjet Evropiane dhe Euroaziatike Derek Hogan. Në një konferencë në Qendrën “Woodrow Wilson” në Uashington, Hogan tha se Shtetet e Bashkuara ndanë rreth 53.6 miliardë dollarë për Kievin në tre muajt e fundit.

Gjermania do të vazhdojë të ndihmojë Ukrainën me armë, tha Kancelari gjerman Olaf Scholz në një konferencë shtypi në Berlin. “Ukraina ka nevojë për armë për t’u mbrojtur. Dhe në këtë fazë veçanërisht kritike, ne po zgjerojmë ndjeshëm mbështetjen tonë”, tha Scholz.

“Scholz dhe qeveria e tij nuk duhet të përpiqen të kërkojnë një ekuilibër në marrëdhëniet Ukrainë-Rusi”, tha Presidenti ukrainas Vollodimir Zelenski në një intervistë për televizionin publik ZDF përpara vizitës së pritshme të kancelarit në Kiev.

Në “Telegram” Zelenski tha se beteja për Severodoneck merr viktima “të tmerrshme”. Komanda ukrainase njoftoi se forcat ruse po sulmonin fuqishëm edhe qytetet Sllavjansk dhe Harkov, ku patën njëfarë suksesi. Nga ana tjetër, ushtria ukrainase tregoi një video se ata janë tashmë 10 kilometra nga qyteti Herson.