Sipas analizës ditore të situatës në Ukrainë nga Instituti për Studimin e Luftës (ISW), në javën e fundit ritmi i operacioneve ruse në pjesën perëndimore të rajonit të Luganskut u rrit ndjeshëm.

Përfshirja e njësive të rëndësishme ushtarake në ofensivën në zonë tregon se ofensiva ruse filloi, megjithëse forcat ukrainase tani për tani po bllokojnë përparimin e tyre. Në analizën e ekspertëve theksohet se ofensiva ruse ndoshta nuk e ka arritur ende ritmin e saj të plotë, pasi komanda ruse nuk i ka angazhuar ende elementët e Ushtrisë së Tankeve të Gardës të stacionuar në rajonin e Luganskut.

Ndërkohë, forcat ukrainase nuk do të jenë më në gjendje të shfrytëzojnë  internetin satelitor të kompanisë amerikane “SpaceX” për të drejtuar dronët ushtarakë. Arsyeja është se përdorimi i “Starlink” për dronët bie jashtë fushëveprimit të marrëveshjes midis “SpaceX” dhe qeverisë ukrainase. Presidentja e kompanisë, Gwynne Shotwell, tha se kontrata ishte bërë për t’u shërbyer nevojave humanitare, si ofrimi i internetit me brez të gjerë për spitalet, bankat dhe familjet e prekura nga lufta.