Një bullgar ka krijuar një robot shtëpiak që do të ndihmojë pacientët që kanë pësuar një goditje në tru apo ndonjë aksident. Shpikja është vepër e inxhinierit Petko Stoev, doktorant në seksionin “Sisteme Fizike-Kibernetike në Institutin e Teknologjive të Informacionit dhe Komunikimit në Akademinë Bullgare të Shkencave. Ai është gjithashtu themelues i një kompanie start-up me objekt veprimtarie krijimin dhe gjenerimin e zgjidhjeve dhe produkteve kibernetike-fizike të teknologjisë së lartë që përmirësojnë cilësinë e jetës së njerëzve. Së fundmi, shkencëtari i ri fitoi çmimin "Sipërmarrësi në shkencë" të fondacionit “Karol Dituria” për shpikjen e tij të fundit.
Ëndrra e fëmijërisë së Petko Stoev ishte të bëhej inxhinier robotik, duke krijuar produkte që zgjidhin lloje të ndryshme problemesh. Ideja për të zhvilluar një krah robotik erdhi pasi një miku i tij i ngushtë pati një aksident të rëndë dhe kishte nevojë për procedura rehabilituese.
Roboti është një ekzoskelet - një pajisje që i vendoset pacientit dhe e ndihmon atë të shërohet në bazë të lëvizjeve dhe procedurave të rehabilitimit. Krahu robotik kryen të gjithë gamën e lëvizjeve natyrale të krahut, duke mundësuar rehabilitimin në distancë. Cilat janë avantazhet e zhvillimit të ri kibernetik bullgar, e mësojmë nga vetë Petko Stoev në një bisedë me Aleksandër Rajçevin nga programi "Hristo Botev" i BNR-së:
“Risia më e rëndësishme është se me këtë robot, pacientët dhe njerëzit që kanë nevojë për rehabilitim, qoftë pas një goditjeje në tru apo pas aksidenteve të rënda me gjymtyrë të thyer, do të mund të shërohen plotësisht në shtëpi ose në kushte komode për ta, në një kohë të përshtatshme për ta – thotë Stoev. – Ky është rehabilitim kudo dhe në çdo kohë. Kur ia japin këtë robot pacientit për përdorim në shtëpi, mjekët do të mund të programojnë në mënyrë autonome, me anë të një kompjuteri, parametrat e programeve të kontrollit dhe nëpërmjet kësaj lidhjeje në distancë, pacientët do të mund të rehabilitohen në shtëpi”.
Shpikja bullgare do të lehtësojë edhe procesin lidhur me monitorimin e vazhdueshëm të pacientit nga profesionisti mjekësor. Sistemi do të regjistrojë të dhëna nga procedurat e kryera dhe do të dërgojë raporte për progresin e çdo pacienti. Dhe një avantazh tjetër - një mjek do të jetë në gjendje të kontrollojë nga distanca pesë ose gjashtë robotë në të njëjtën kohë dhe do t'i monitorojë ata në kohë reale.
“Kështu, në një njësi kohore, në vend që të trajtojë dhe rehabilitojë një pacient, mjeku do të jetë në gjendje të rehabilitojë shumë pacientë. Roboti ynë ofron zgjidhje të disa çështjeve, si kapaciteti i kufizuar i klinikave spitalore, përveç kësaj ai eliminon problemin me oraret”, thotë inxhinieri Petko Stoev.
Zhvillimi kibernetik u shoqërua me një anketë në mesin e ekspertëve mjekësorë në vend, dhe mbi 90% prej tyre dhanë mendim pozitiv se kjo do të lehtësojë punën e tyre dhe do të zvogëlojë rrezikun e sëmundjeve profesionale te rehabilituesit, tha Stoev. Shpikësi i ri shton se aktualisht është duke u zhvilluar procesi i patentimit dhe certifikimit të pajisjes. Roboti tashmë është duke u vendosur për testime klinike dhe i është nënshtruar vërtetimit në një laborator.
Shikoni më shumë:
Autor: Veneta Nikollova (në bazë të një interviste me Aleksandër Rajçev nga programi "Hristo Botev" i BNR-së)
Përgatiti në shqip: Vesella Mançeva
Foto: karollknowledge.bg, re4life.eu
Pak ditë para fillimit të vitit të ri shkollor 2024-2025, lindi ideja e ndalimit të plotë të celularëve në shkollë. Arsyet kryesore për një vendim të tillë janë shkalla e ulët e suksesit në shkollë, shpërqendrimi i nxënësve dhe mbi të gjitha pasojat e..
Vitin e kaluar, ndërsa ekonomia e Bashkimit Evropian vuante nga inflacioni galopant dhe rritja e ndenjur, presidentja e Komisionit Evropian Ursula von der Leyen ngarkoi ish-guvernatorin e Bankës Qendrore Evropiane dhe ish-kryeministrin italian Mario..
Hekurudha nëntokësore e qytetit të Sofjes doli të ishte ndër më të pëlqyerat në Evropë. Metroja e Sofjes renditet e dyta, e tejkaluar vetëm nga ajo në Oslo, njofton TV Euronews. Sondazhi u krye nga kompania Bounce dhe u morën parasysh një sërë..
Këneta е Bojanës është e vetmja ligatinore natyrore në territorin e Sofjes, e cila është ende shtëpia e një numri speciesh të mbrojtura të bimësisë..
Të dhënat e censusit të popullsisë në vendin tonë, të kryer në vitin 2021, tregojnë se në vend jetojnë 654 547 persona, të cilët janë me paaftësi të..