Bullgaria do të importojë pjesë dhe materiale nga Rusia për të siguruar funksionimin e sigurt dhe riparimet vjetore të centralit atomik “Kozlloduj”, ka vendosur qeveria. Kjo bëhet përmes një përjashtimi nga sanksionet e BE-së, të cilat ndalojnë importet nga Rusia për shkak të luftës në Ukrainë, njoftoi ministri i energjisë Rosen Hristov.

"Kjo është e një rëndësie kritike për sigurinë e centralit bërthamor. Bëhet fjalë për materiale, shërbime dhe pjesë për të cilat ende nuk kemi gjetur furnitorë alternativë. Drejtimi tjetër në të cilin po punohet është sigurimi i më shumë rezervave të atyre materialeve dhe pjesëve për të cilat ende nuk mundemi të gjejmë furnizime alternative për të garantuar funksionimin e papenguar të centralit atomik “Kozlloduj” për vitet në vijim, shtoi ministri.