Azerbajxhani planifikon të dyfishojë furnizimet me gaz natyror në Evropë deri në vitin 2027. Këtë e bëri të ditur në Sofje presidenti i Azerbajxhanit, Illham Aliev. Ai ishte i ftuar special në ceremoninë e nënshkrimit të Memorandumit të Mirëkuptimit për nxitjen e bashkëpunimit ndërmjet operatorëve të sistemeve të transportimit të gazit të Bullgarisë (“Bullgartransgaz”), Rumanisë (Transgaz), Hungarisë (FGSZ), Sllovakisë (Eustream) dhe Kompanisë Shtetërore të Naftës të Azerbajxhanit (SOCAR). Dokumenti ka të bëjë me nismën e Unazës së Solidaritetit të propozuar nga Bullgaria, e cila synon të rrisë sigurinë e furnizimit me gaz natyror në Bashkimin Evropian. “Memorandumi do të rrisë konektivitetin midis vendeve dhe do të rrisë kapacitetin e rrjeteve të tyre të transportimit të gazit”, tha presidenti Rumen Radev, i cili është nikoqir i veprimtarisë.