78 persona humbën jetën për shkak të zjarrit në një hotel në vendpushimin turk të skive Kartalkaya, provinca Bolu, në veriperëndim të Turqisë. Në mesin e të vdekurve ka familje të tëra dhe persona të famshëm, si dhe dhjetëra të plagosur, raportoi BTA. Hoteli shumëkatësh me fasadë druri në resortin e njohur mori flakë natën e 21 janarit, kur në ndërtesë kishte 238 të ftuar. Për shkak të incidentit në Turqi është shpallur ditë zie kombëtare. Në këtë rast ka disa të arrestuar, përfshirë pronarin e hotelit, nënkryetarin e bashkisë Bolu dhe zëvëndës shefi i zjarrfikësve. 

Dyshohet se zjarri ka rënë në restorantin e hotelit me katër yje. Në atë moment nuk kishte asnjë zjarrfikës në resort. Makina e parë e zjarrfikësve mbërriti 45 minuta pas shpërthimit të zjarrit. Gazeta Hurriyet shkruan se pas shkaqeve të tragjedisë qëndron një "zinxhir neglizhence". Sipas dëshmitarëve, sensorët e alarmit të zjarrit dhe tymit nuk funksionuan dhe shkallët e emergjencës në hotel nuk përmbushnin standardet.

Mbi 16,000 nxënës janë përjashtuar nga shkollat në Greqi për shkak të përdorimit të celularëve në klasë. Masa e rreptë është pika kryesore e politikës së Ministrisë së Arsimit për vitin shkollor aktual. Pavarësisht rezistencës së dukshme të nxënësve ndaj tij, ai do të zbatohet me rigorozitet, siguroi ministri i Arsimit Kyriakos Pierrakakis. Për shkeljen e parë nxënësi përjashtohet nga klasa për një ditë dhe njoftohen prindërit e tij, për shkeljen e dytë vijon përjashtimi dhe transferimi në një shkollë tjetër, raporton korrespondentja e BNR-së Katja Peeva nga Greqia. Ekziston një lidhje e drejtpërdrejtë midis përdorimit të celularëve dhe shëndetit mendor të adoleshentëve, mendojnë psikologët. Shumë nxënës janë të varur nga kontaktet e tyre sociale në internet. Për më tepër, “ngacmimi bashkëjeton me celularin”, theksoi Pierrakakis në një intervistë televizive për ANT1. Mësuesit pretendojnë se fëmijët përqendrohen dhe mësojnë shumë më lehtë pa celularët e tyre.

Megjithatë, numri i madh i nxënësve të përjashtuar vë në pikëpyetje arsyeshmërinë e masës së vendosur, komenton botimi grek “Ta Nea”.

Thirrja për të bojkotuar dyqanet në Kroaci më 24 janar u përhap në rrjetet sociale dhe si mesazh në telefonat celularë. Arsyeja për këtë janë çmimet e larta, raportoi BTA. Sipas të dhënave nga Enti i Statistikave Kroate në dhjetor 2024 inflacioni në Kroaci ka arritur në nivelin më të lartë në 8 muaj. Thirrja është mbështetur edhe nga dy ministra të qeverisë së Andrej Plenkoviç. Njëri është Branko Baçiç, zëvendëskryeministër dhe ministër i Planifikimit Hapësinor, Ndërtimit dhe Pronës Shtetërore, ndërsa tjetri është Ministri i Ekonomisë Ante Susnjar, i cili personalisht në fund të vitit 2024 u bëri thirrje qytetarëve që të sanksionojnë ata tregtarë që i rrisin çmimet në mënyrë të paarsyeshme.

Qeveria e Plenkoviçit po përgatit një listë me 50 produkte "të mbrojtura" për të lehtësuar buxhetet e familjeve. Tregtarët dhe prodhuesit, nga ana e tyre, pohojnë se ndër arsyet e çmimeve të larta është fakti se vendi ka një nga normat më të larta të TVSH-së në Evropë - 25%.

Sipas të dhënave të Eurostat për muajin dhjetor 2024. Kroacia është ndër tre vendet anëtare me inflacionin mesatar vjetor më të lartë. Ajo renditet e treta me 4.5% pas Rumanisë dhe Hungarisë, me një normë mesatare inflacioni në BE prej 2.4%.

Presidenti serb Aleksandar Vuçiq njoftoi nga resorti zviceran Davos, ku shkoi për takimin vjetor të Forumit Ekonomik Botëror, se nga viti 2027 në vendin e tij do të përdoren makina fluturuese. Vuçiq ka folur për këtë temë me përfaqësuesit e kompanisë amerikane Archer Aviation, raporton agjencia serbe “Beta”. Presidenti theksoi se kjo është një nga kompanitë më të njohura që merret me makinat fluturuese dhe dronët. “Ne kemi filluar negociatat për blerjen e të paktën tre automjeteve të tilla”, tha Vuçiq.

Ai shtoi se Serbia është duke negociuar edhe me “miqtë tanë kinezë”, të cilët, sipas tij, kanë bërë përparime të konsiderueshme në këtë fushë dhe kanë makina fluturuese në disa qytete, qëllimi është që deri në vitin 2026 të bëhen ndryshimet e nevojshme rregullatore "që të mundemi në vitin 2027 të përdorim makinat fluturuese dhe dronët". Vuçiq theksoi se në ekspozitën e specializuar ndërkombëtare Expo-2027, e cila do të mbahet në Beograd, Serbia dëshiron të tregojë se është "vendi që po modernizohet më shpejt dhe po rritet më shpejt në Evropë".

Përpiloi: Miglena Ivanova

Foto: AP, Diana Gllasnova/BTA, Reuters, Unsplash

Përgatiti në shqip dhe publikoi: Kostandina Bello