Droni që fluturoi mbi Aeroportin e Sofjes është një lloj ushtarak që përdoret për spiunazh dhe vëzhgim

Droni misterioz që po bënte manovra të rastësishme mbi Aeroportin e Sofjes më 7 shkurt të këtij viti dhe që vonoi 6 fluturime, ishte hakuar, manipuluar dhe nuk ishte aksidental. Dronët e mëdhenj si ai i përdorur janë të tipit ushtarak, që përdoren për spiunazh dhe vëzhgim, komentoi për Televizionin Kombëtar Bullgar (BNT) kreu i Policisë Kufitare, Anton Zllatanov.

"Një dron që është shitur nga një kompani e licencuar nuk do të mund të fluturojë mbi aeroport, pasi zona është e ndaluar. Kjo tregon se droni është manipuluar dhe se ky është një veprim i synuar," tha Zllatanov.

Droni me sa duket është hakuar. Këtë e ka pranuar për media edhe kryetari i Shoqatës Bullgare të Industrisë së Aviacionit, Todor Ivanxhikov. "Në softuerin e shumicës së dronëve, aeroporti është vendosur si një zonë e ndaluar. Ky dron është qartë i hakuar ose i montuar posaçërisht, me një softuer që e lejon atë të shkojë kudo," komentoi eksperti.

• Aeroportet ndërkombëtare në Bullgari do të pajisen me sisteme anti-drone