Gradualisht, me donacione dhe me ndihmën e organizatave të emigrantëve dhe Kishës Ortodokse Bullgare, po krijohen kisha të pavarura ku bashkatdhetarët tanë mund të luten.

Vitet e fundit, qendra të tilla shpirtërore janë krijuar në Hamburg dhe Shtutgart. “Ne po ashtu do të hapim kishën e re ortodokse bullgare “Shën Ivan Rillski” në Londër në fund të shkurtit”, tha për Radio Bullgarinë Mitropoliti i Evropës Perëndimore dhe Qendrore Antonij, i cili ka 12 vjet që drejton dioqezën dhe ka qenë i ftuar në episodin e parë të podcast-it tonë të ri “Ura e besimit”.

Kisha Ortodokse Bullgare, në shërbesën e saj jashtë vendit, është në bashkëpunim të ngushtë me kishat e tjera lokale jashtë vendit, duke ndihmuar njëra-tjetrën në shërbesën e tyre dhe duke mbështetur njëra-tjetrën në ruajtjen e vlerave të krishtera. Si anëtar i Konferencës së Peshkopëve Ortodoksë në Evropën Perëndimore dhe Qendrore, Mitropoliti merr pjesë në mbledhjet kishtare me përfaqësues të të gjitha kishave ortodokse vendore, ku diskutohen çështje që lidhen me sfidat bashkëkohore me të cilat përballet Kisha Ortodokse. Prej disa vitesh në vende të ndryshme organizohen takime të të rinjve, ku priftërinjtë bullgarë marrin pjesë në liturgji që synojnë tërësisht brezin e ri, të cilët ndjekin me interes shërbesat. Takime mbahen edhe me përfaqësues të besimeve të tjera të krishtera dhe atyre jo të krishtera:

"Ne të gjithë jetojmë në të njëjtën tokë dhe çështjet që lidhen me moralin, spiritualitetin dhe etikën kanë të bëjnë me të gjitha besimet kryesore të njohura fetare. Edhe ne ndjekim me interes, por edhe me shqetësim atë që po ndodh në botën moderne. Këto janë luftërat, kriza e vlerave morale, liberalizmi i tepruar në shoqërinë tonë, i cili i largon njerëzit nga Zoti, mjegullon kufijtë ndërmjet të mirës dhe të keqes. Nganjëherë, me keqardhje dhe pikëllim të madh, vërejmë edhe gjëra për të cilat natyrisht dalim me deklarata përkatëse, por nga vetë institucionet varet nëse do të dëgjohen nga të tjerët."

Sipas Mitropolitit Antonij, ka një interes mjaft të madh për Kishën Ortodokse, veçanërisht nga njerëzit që janë rritur në një mjedis tepër laik, si në Evropën Perëndimore dhe Qendrore. "Misticizmi në Ortodoksi, këngët, brendësia, vetë atmosfera dhe, mbi të gjitha, bekimi që derdhet me bollëk për shkak të lutjeve të klerikëve dhe të gjithë atyre që janë në tempullin e shenjtë, nuk mund të mos ndihen nga të pranishmit. Edhe pse ende neofite, pra që e kanë përqafuar rishtas besimin ortodoks, duke ardhur në tempull dhe duke deklaruar interesin e tyre, ata menjëherë kalojnë në gjirin e të ndriturve - atyre që duan të dëgjojnë Fjalën e Zotit dhe të njihen me të në detaje për të zgjedhur rrugën e tyre, vëren mitropoliti dhe shpjegon:

"Janë të paktë ata që e ndjekin liturgjitë ndër vite dhe më në fund vendosin që duan jo vetëm të marrin pjesë, por edhe të komunikojnë me priftërinjtë, me ortodoksë të tjerë dhe më në fund arrijnë në vendimin se duan të pranojnë besimin ortodoks. Dhe kur e pranojnë atë, janë shumë të zellshëm, shumë të vendosur, shumë të përkushtuar ndaj asaj që duhet të bëjnë. Një shembull i tillë është Manastiri Ortodoks Gjerman “Trinia e Shenjtë” në Buchagen. Aty janë pesë murgj, të gjithë gjermanë që kanë pranuar besimin ortodoks, nën udhëheqjen e Arkimandrit Johannes Pfeiffer. Aty ata e ndërtojnë manastirin me mundin e tyre, me duart e tyre. Është në përfundim edhe ndërtimi i kishës së madhe në manastir. Ky është një shembull i gjermanëve që kanë pranuar Ortodoksinë dhe po edukojnë gjermanët, dhe shumë njerëz atje pagëzohen sipas një tradite të lashtë vetëm një herë në vit, pasi përgatiten, për Ngjalljen e Krishtit. Ashtu si tradita e lashtë, gjatë gjithë Javës së Shenjtë ata veshin veshje të bardha, sepse të gjithë ata që pagëzoheshin më përpara për Pashkë mbanin rroba të bardha dhe të ndritshme."

Nga kjo traditë e lashtë vjen edhe emri “Java e Shenjtë”. Për botën e jashtme, e gjithë kjo duket mbresëlënëse, madje edhe ekzotike, por për ata që janë të vetëdijshëm, është një përvojë e vërtetë shpirtërore. “Është një gëzim i madh shpirtëror për të gjithë ne kur shohim kaq shumë të rinj, me familjet e tyre, duke u pagëzuar, duke ardhur në kishë çdo të diel, duke marrë pjesë në Sakrament dhe në jetën e Kishës”, vë në dukje Mitropoliti Antonij dhe shton: