Një ndalim ligjor për reklamimin e ushqimeve me përmbajtje të lartë sheqeri, yndyre dhe kripe të destinuara për fëmijët nën 18 vjeç është ajo që kërkon Shoqata për Ushqim të Përballueshëm dhe Cilësor, njofton gazetarja e BNR-së Veselina Millanova. Sipas ekspertëve, rregullore të ngjashme ekzistojnë prej kohësh në vendet e tjera evropiane dhe vendi ynë po mbetet prapa në kujdesin për shëndetin e adoleshentëve. Qëllimi i propozimit është të ndalojë ndikimin e reklamave të dëmshme ushqimore ndaj të rinjve, të cilët janë më të ndjeshëm ndaj marketingut agresiv dhe konsumit të produkteve të pashëndetshme.

Në muajt e fundit, një numër vendesh evropiane kanë ndërmarrë hapa të guximshëm dhe të shumëpritur drejt krijimit të një mjedisi ushqimor më të shëndetshëm, me një fokus të veçantë në mbrojtjen e fëmijëve dhe grupeve më të pambrojtura në shoqëri”, theksojnë nga shoqata, duke përmendur shembuj nga vende të ndryshme. Disa prej tyre parashikojnë që kuadri legjislativ të mbulojë edhe platformat digjitale, duke përfshirë rrjetet sociale dhe kanalet e marketingut të influencuesve, të cilat deri më tani kanë mbetur pothuajse tërësisht të parregulluara. “Këto masa janë një angazhim i vërtetë për shëndetin e qytetarëve dhe janë një përgjigje ndaj niveleve në rritje të sëmundjeve kronike, obezitetit dhe çrregullimeve të të ngrënit, veçanërisht tek fëmijët”, thekson shoqata. Ekspertët besojnë se shteti duhet të ndërmarrë gjithashtu fushata kombëtare informuese në mbështetje të të ushqyerit të shëndetshëm.

Redaktoi: Diana Cankova

Përgatiti në shqip dhe publikoi: Svetllana Dimitrova

Foto: zdkh.bg