Ndërveprimi mes mësuesit dhe nxënësit është në fokus të javës së shtatë me radhë Ndërkombëtare “Erasmus+”, e organizuar nga Universiteti i Veliko Tërnovos “Shën Kirill dhe Metodij” në ndihmë të shkollave bullgarisht të së dielave jashtë vendit.

Institucioni i lartë arsimor në qytetin tonë të vjetër mbretëror krenarizohet me punën e vet novatore në lidhje me veprimtarinë arsimore dhe metodike, të drejtuar posaçërisht ndaj institucioneve arsimore bullgare jashtë vendit. Partnerë të tij janë rreth 40 përfaqësues të shkollave tona të së dielave në botë, ndërsa këtë vit pjesëmarrjen e kanë konfirmuar 35 mësues dhe drejtorë nga 11 shtete – Spanja, Greqia, Qipro, Italia, Gjermania, Austria, Turqia, Rumania, Serbia, Shqipëria dhe Emiratet e Bashkuara Arabe.

Forumi fillon sot në Korpusin e Pestë të universitetit, ndërsa programi vazhdon deri më 4 korrik me një seri takimesh dhe shkëmbim përvojash të mira midis të gjithë pjesëmarrësve. Në dobi të bashkëpunimit më të mirë është edhe takimi online i organizuar mes studentëve “Erasmus+”, drejtorëve dhe mësuesve nga shkollat bullgare jashtë vendit.

Si traditë po konsolidohet edhe dorëzimi i librave dhe mjeteve mësimore përmes aksionit bamirës “Kauza Bullgaria” – një program vullnetar i Universitetit të Veliko Tërnovos, në të cilin secili mund të përfshihet me mjete personale dhe donacione.

“Kauza Bullgaria” është moto edhe e një filmi artistik me metrazh të gjatë, i xhiruar në Romë, i cili paraqet emocionet dhe përjetimet e nxënësve nga shkolla e së dielës “Asen dhe Ilija Pejkovi” në kryeqytetin italian. Filmi paraqet dashurinë ndaj Bullgarisë dhe ndaj gjuhës bullgare tek këta fëmijë, disa prej të cilëve kurrë nuk kanë shkelur në tokën bullgare, por e ndiejnë vendin tonë si atdheun e tyre dhe madje ëndërrojnë që ndonjë ditë të jetojnë këtu. Autori i filmit Emill Matov ndan se tek ne pak njihet jeta dhe përjetimet e shkollave bullgare të së dielave jashtë vendit. Dhe kjo edhe njëherë forcon rolin dhe rëndësinë e takimeve ndërkombëtare që organizon universiteti, të lidhura me programin e tij kombëtar “Zhvillimi dhe konsolidimi i bullgaristikës jashtë vendit.”

“Në këtë Javë Ndërkombëtare “Erasmus+” marrin pjesë edhe përfaqësues të Ministrisë së Arsimit dhe Shkencës, të cilët janë partnerë të rëndësishëm në punën e shkollave të së dielave. Po gjejmë mënyra të angazhojmë edhe studentët në të gjithë këtë proces” – sqaron për Radio Bullgarinë prof. Marianna Mandeva, pedagoge dhe koordinatore e studentëve, praktikantëve dhe doktorantëve për praktikat “Erasmus+” në universitet, të cilat japin mundësi për punë në terren në shkollat jashtë vendit:

Të dobishme janë edhe takimet midis pedagogëve në shkollat bullgare të së shtunë-dielave jashtë vendit dhe përfaqësuesve të Ministrisë së Arsimit, të cilët janë mysafirë në Veliko Tërnovo. Zakonisht ata përgjigjen për pyetje të lidhura me bazën ligjore, me mungesën e mjeteve mësimore dhe probleme të tjera të pazgjidhura ndër vite, thotë më tej prof. Mandeva:

“Ka disa mangësi në bazën ligjore, për të cilat po punohet, siç na sigurojnë nga institucionet. Nga shkollat zakonisht më ndajnë për mungesën e disa specialistëve. Veçanërisht në fushat e historisë, gjeografisë, gjuhës bullgare mungojnë mësues të përgatitur. Ndërsa pamja më e gjerë e problemeve do të jepet gjatë diskutimeve nga data 2 deri më 4 korrik në Universitetin e Veliko Tërnovos.”