Një ngjarje e jashtëzakonshme muzikore pritet më 20 gusht në Varna. Në kuadrin e festivalit "Opera në Teatrin Veror", për herë të parë jo vetëm në historinë e saj 78-vjeçare, por edhe në historinë e teatrit bullgar të operës, Opera e Varnës do të prezantojë një nga veprat më të famshme muzikore dhe skenike çeke - "Rusalka" nga Antonín Dvořák. Ekipi i produksionit drejtohet nga dirigjenti i njohur bullgar me një karrierë të suksesshme evropiane - Pavell Balev,  regjisorja është Srebrina Sokollova, skenografia është e artistit vizual Petko Tançev, fitues i çmimit "Ikar". Kostumet janë të Asja Stoimenovës, koreografja është Nadja Dimokova. 

Në një intervistë të posaçme për Radio Bullgarinë, dirigjenti Pavell Balevtregoi se që nga fundi i korrikut punon aktivisht me ansamblet e Operas së Varnës:

"Të gjithë punojnë me entuziazëm të madh. Mendimi i përgjithshëm është se muzika është shumë e bukur. Që në provat e para të orkestrës, të gjithë treguan se sa shumë duan të punojnë. Kjo më frymëzon dhe më jep arsye serioze për optimizëm."

Pavell Balev ka interpretuar pothuajse të gjitha simfonitë e Dvořák -ut, ka regjistruar fragmente të operës së tij pothuajse të panjohur "Dmitri" me pjesëmarrjen e Krasimira Stojanovës, por ka dirigjuar në tërësi vetëm "Rusalka". Kjo është shfaqja e tij e parë si dirigjent kryesor në një nga teatrot më prestigjioze franceze - Teatri i Operës në Limoges. Balev na tregoi për përvojën e tij me "Rusalka"-n e Dvořák -ut:

"Gjatë COVID-2021, Teatri i Operës i Limoges ishte i vetmi teatër që vazhdoi të punonte. Kishim leje të lëviznim nëpër rrugë pas orës 6 të mbrëmjes. Të gjitha teatrot në Francë ishin të mbyllura dhe prisnin vendimin e Macron - nëse publiku do të hynte në sallë apo jo. Por ne vazhduam të punonim me dyer të mbyllura për katër javë dhe në fund, pasi u mor vendimi për të mos hapur teatrot, patëm një opsion "B". Regjisori ynë kishte ftuar, pavarësisht vendimit të qeverisë, televizionin francez për të bërë një film. Një ekip televiziv erdhi dhe regjistroi prodhimin tonë për një javë. U transmetua dhe sot "Rusalka" nga Teatri i Operës i Limoges mund të gjendet kudo në hapësirën mediatike - një film shumë i bukur, jam vërtet krenar për të."

Më të emocionuarit për premierën e “Rusalka”-s në Varna janë fansat e këngëtares së madhe operistike bullgare Krasimira Stojanova, e cila do të interpretojë në rolin kryesor më 20 gusht.

Midis elitës së operës, ylli bullgar njihet si një nga interpretueset më të suksesshme të rolit. Pas debutimit të Stojanovës si Rusalka në Cyrih, kritikët e quajtën atë “zgjedhja ideale për rolin”.

Partneri i Krasimira Stojanovës në rolin e Princit do të jetë tenori austriak Gerard Schneider. Në produksion marrin pjesë edhe Irina Zhekova, Bozhidar Bozhkillov, Mihaella Berova, Ilina Mihajllova, Zhana Kostova, Reinaldo Droz, Petër Najdenov, Veliçka Minkova.

Përgatiti në shqip dhe publikoi: Vesella Mançeva

Foto: Opera Shtetërore e Varnës