Ish-Shtëpia-Monument e Partisë Komuniste Bullgare në majën Buzlluxha duhet të ruhet dhe të shndërrohet në një destinacion turistik, i cili do të sjellë përfitime dhe të ardhura për rajonin. Rreth kësaj ideje u bashkuan vizitorët e Festivalit "Open Buzludzha", të cilët ndanë me agjencinë BTA vizionin e tyre për të ardhmen e këtij monumenti. Festivali treditor mblodhi mysafirë nga vendi dhe nga jashtë, të cilët erdhën për të mësuar më shumë rreth historisë së monumentit, si dhe për aktivitetet e ardhshme për ruajtjen dhe shoqërimin e tij me jetën publike.

“Duke qenë se për afro 35 vjet nuk u bë asgjë në këtë drejtim, mendoj se projekti i ardhshëm i Komunës së qytetit Kazanllëk për sigurimin e monumentit është një fillim i mirë”, tha fotografi nga Kazanllëku, Bedros Azinjan, i cili ka qenë një nga fotografët zyrtarë të objektit gjatë ndërtimit dhe funksionimit të tij. Ai shprehu shpresën që projekti të ketë vazhdimësi dhe një pjesë e monumentit të restaurohet, në mënyrë që të mund të kthehet në një atraksion turistik.

"Monumentin e shoh nga tarraca ime çdo mëngjes", tregoi për BTA Todor Ivanov nga Kazanllëku. Ai theksoi se e frekuentoi festivalin me fëmijët e tij jo vetëm për shkak të programit interesant ditor, por edhe sepse dëshiron që ata të mësojnë për historinë, sado e dhimbshme të jetë ajo.

Gjatë 36 muajve të ardhshëm pritet të zbatohet projekti “Ruajtja dhe përshtatja e monumentit Buzlluxha – Faza 1 – Konsolidimi”, që është pjesë e Konceptit për Investime Territoriale të Integruara të Komunës së Kazanllëkut. Aktivitetet do të realizohen në bashkëpunim me fondacionin “Projekti Buzlluxha” dhe me Administratën Rajonale të qytetit Sliven, pasi monumenti është pronë shtetërore private. Vlera e projektit është pothuajse shtatë milionë leva. Parashikohet ndërtimi i një çatie të re dhe zëvendësimi i dritareve të godinës, të cilat janë ndër hapat më urgjentë për sigurimin e saj.

Më shumë për monumentin mund të lexoni në botimet e mëposhtme:

• Buzluxha – kujtesa e kohës

• Dora, e cila dëshiron t'i japë frymë të re Buzlluxhës: "Qëllimi është as të falësh e as të harrosh"

• #Buzlluxha: simboli komunist bullgar është bërë i famshëm në Instagram

Përpiloi: Joan Kolev

Përgatiti në shqip dhe publikoi: Svetllana Dimitrova

Foto: BTA