Nga data 12 tetor 2025, fillon zbatimi gradual i Sistemit për Hyrje/Dalje (EES) nëpër pikat kufitare të Bullgarisë. Ky sistem do të aplikohet për shtetasit e vendeve jashtë Bashkimit Evropian, të cilët udhëtojnë drejt vendeve evropiane që përdorin sistemin EES, për qëndrime afatshkurtra deri në 90 ditë, brenda një periudhe 180-ditore, pavarësisht nëse ata kanë nevojë për vizë afatshkurtër apo jo.

Në Bullgari, sistemi EES do të aplikohet në mënyrë graduale, shkruhet në faqen zyrtare të Ministrisë së Punëve të Jashtme. Fillimisht, nga data 12.10.2025, ai do të zbatohet në të gjitha pikat kufitare ajrore dhe detare të vendit, ndërsa në kufijtë tokësorë – fillimisht vetëm në pikën kufitare Kallotino me Serbinë. Deri në fillim të vitit 2026, sistemi do të vihet në funksion edhe në pikat e tjera tokësore të kalimit kufitar.

EES është një sistem plotësisht i automatizuar dhe digjital, që zëvendëson në masë të madhe vulosjen e pasaportave në pjesën më të madhe të Evropës. Në këtë sistem do të ruhen të dhëna për datat e hyrjes dhe daljes të shtetasve nga vendet jashtë BE-së, të dhënat biometrike të tyre, si edhe informacionet nga dokumentet e tyre të udhëtimit. Edhe refuzimet për hyrje do të regjistrohen në sistem.