Zbulimi më i fundit arkeologjik në kompleksin e hershëm historik prej guri të Perperikonit në Rodopet Lindore do të prezantohet sot, 10 tetor, tha arkeologu Nikollaj Ovçarov për BTA.

Kreu i gërmimeve tha se është një tempull gjigant i rrumbullakët, ndoshta i dedikuar kultit të Diellit. Objekti daton në shekullin e 3-të-4-të dhe vazhdon traditën e shenjtërores së lashtë të Dionisit trak në periudhën romake të qytetit shkëmbor.

Tempulli ndodhet në Lagjen Jugore, rreth 20 m nga bazilika e madhe nga shekujt 5-6 dhe ka shumë të ngjarë të jetë i lidhur me dhjetëra mauzoleume të rrumbullakëta dhe drejtkëndëshe të zbuluara nga faza e fundit e epokës pagane dhe fillimi i krishterimit.

Kompleksi i disa tempujve të dedikuar hyjnive të ndryshme rreth shenjtërores së Dionisit trak, së bashku me mauzoleumet, formuan Area Sacra – Zonën e Shenjtë në Lagjen Jugore të Perperikonit. E gjithë kjo ndodhej përreth rrugës kryesore me një gjerësi prej 4 m, e cila të çonte në Akropol.

Redaktoi: Ivo Ivanov

Përgatiti në shqip dhe publikoi: Vesella Mançeva

Foto: BTA