Bullgaria është një faktor kyç për BE-në në luftën kundër korrupsionit dhe krimit të organizuar në Ballkan

botuar më 10-03-18 12.36.MD

Në Sofje u zhvillua konferenca me temë “Shembulli bullgar në luftën kundër korrupsionit dhe krimit të organizuar”, në të cilën mori pjesë edhe kryetari i Partisë Popullore Evropiane Wilfried Martens (djathtas).

Foto: BGNES

Me ardhjen e saj në pushtet qeveria e qendrës së djathtë e partisë GERB ndërmori veprime masive kundër krimit të organizuar dhe korrupsionit në katet e larta të pushtetit. Kjo u vlerësua lart në dy raporte të departamentit të shtetit të SHBA-s dhe pritet që të vlerësohet dhe në raportin e radhës të KE-së në fund të kësaj jave. “Qeveria ka vullnetin politik dhe vepron ashtu siç pritet nga ne në Evropë dhe Amerikë” – tha kryeministri Bojko Borisov në një konferencë të organizuar nga Partia Popullore Evropiane (PPE) në Sofje, me temë “Shembulli bullgar në luftën kundër korrupsionit dhe krimit të organizuar”. Sipas kryeministrit suksesi i kësaj lufte do të çojë dhe në sukses të përvetësimit të fondeve evropiane, që është një instrument i rëndësishëm për daljen nga kriza.

“Korrupsioni ka shumë fytyra – tha Bojko Borisov. – Ai shfaqet në shumë fusha, ka shpërdorime që i shkaktojnë dëme shtetit për qindra miliona leva. Një shembull për këtë është Kompania Elektrike Kombëtare, në të cilën ka shpërdorime të mëdha dhe në praktikë kompania është çuar deri në falimentim.”

Kryetari i PPE Wilfried Martens deklaroi mbështetje për kabinetin e Borisovit për masat jopopullore dhe vlerësoi lart arritjet në luftën kundër krimit të organizuar dhe korrupsionit.

“Si rezultat për afro gjysmë viti, kur vendet e tjera luftojnë krizën, vendi juaj arriti një nivel pozitiv të stabilitetit financiar – tha ai. – Si shteti, ashtu edhe tërë shoqëria mbështet përpjekjet e qeverisë të luftojë krimin e organizuar dhe korrupsionin. Kjo është një luftë e vërtetë kundër forcave të së keqes, të cilat bllokojnë zhvillimin e Bullgarisë dhe mundësitë për një jetesë më të mirë. Jam i kënaqur se qeveria ka vullnetin politik për këtë luftë” – tha zoti Martens dhe theksoi se PPE do të inkurajojë Bullgarinë në këtë luftë deri në fitoren përfundimtare, sepse kjo është e rëndësishme për tërë Evropën. “Qeveria e tanishme e Bullgarisë është e vetmja alternativë në luftën kundër krimit të organizuar dhe korrupsionit. Ajo nuk ka përfunduar, por Bullgaria është në rrugën e drejtë” – ishte kategorik Martens.

Sipas sekretarit të përgjithshëm të PPE Antonio Lopez, Bullgaria është një faktor kyç për BE në luftën kundër korrupsionit dhe krimit të organizuar në Ballkan. “Ky është një moment i rëndësishëm jo vetëm për Bullgarinë, por edhe për tërë Evropën – është i bindur ai. – Bullgaria duhet të marrë udhëheqjen në këtë regjion specifik, i cili është shumë i rëndësishëm për BE.”

Sipas ministrit të punëve të brendshme Cvetan Cvetanov, përveç vullnetit politik të pushtetit ekzekutiv, duhet të ketë vullnet dhe nga ana e pushtetit gjyqësor. Ai shpjegoi se po diskutohet ideja për ristrukturim të Këshillit të Lartë Gjyqësor.

“Mendoj se kuota politike në Këshillin e Lartë Gjyqësor nuk është e dobishme. Ne, politikanët, duhet të rrimë larg sistemit gjyqësor, i cili duhet të jetë në të vërtetë i pavarur. Prandaj në përbërjen e Këshillit të Lartë Gjyqësor duhet të ketë profesionistë që kanë vërtetuar cilësitë e tyre, që nuk janë ngarkuar me elemente politike. Duhet të ketë një dialog dhe me Organizatën e Gjyqtarëve, të kërkojmë njerëz që mund ta realizojnë reformën. Sepse sot, 20 vjet pas tranzicionit në demokraci, sistemi gjyqësor ende nuk është reformuar. Kjo statukuo duhet të ndryshohet.”

Përgatiti në shqip: Ekaterina Tarpomanova

По публикацията работи: Tatjana Obretenova

Последвайте ни и в Google News Showcase, за да научите най-важното от деня!

Ndaje

Bullgaria është një faktor kyç për BE-në në luftën kundër korrupsionit dhe krimit të organizuar në Ballkan

Më shumë nga rubrika

Shoqata “Komuniteti Ortodoks Bullgar në Çeki” bën thirrje për mbështetje

Manastiri i Trojanit i dhuron relikte të shenjta kishës “Shën Parasqevi-Petka” në Trojan

150 studentë me origjinë bullgare do të mund të studiojnë në Universitetin e Ruses në Taraklia

Ekipet olimpike të shkencave natyrore u nderuan me flamurin kombëtar

Uji i detit pranë Primorskos është ndër më të pastrat në Evropë

Tetë bizonë të rinj u vendosën në Rodopet Lindore