Inkurajimi i të rinjve në zgjedhjen e rrugës së tyre profesionale – një prej qëllimeve të Strategjisë kombëtare për rininë

botuar më 10-10-11 12.11.MD

Inkurajimi i aktivitetit ekonomik dhe i zhvillimit profesional të të rinjve, ulja e numrit të nxënësve që largohen nga shkolla dhe rritja e përqindjes së të rinjve me arsim të lartë – këto janë ndër qëllimet kryesore të Strategjisë kombëtare për rininë 2010 – 2020, e cila u miratua para pak kohe nga qeveria. Strategjia u është drejtuar njerëzve të moshës 15 – 29 vjeç dhe është në përputhje me masat e përgjithshme për zhvillim të të rinjve në BE. Jo vetëm miratimi i një dokumenti të tillë, por dhe veprimet konkrete, me të cilat ai do të përkrahet, janë me rëndësi të madhe për inkurajimin e të rinjve bullgarë për t’u mbetur në vend. Gjatë disa viteve të fundit vëzhgohet rritje e dëshirës së tyre për të emigruar. Në fakt çdo i ri i tetë ka qëllime konkrete për të kërkuar realizim jashtë në të ardhmen e afërt. Nga viti 1989 e këtej popullsia e Bullgarisë është ulur me mbi një milion veta dhe 1/3 prej këtij një milioni janë pikërisht njerëzit e rinj. Një prognozë e Institutit kombëtar të statistikës tregon se në periudhën deri më 2020 numri i tyre do të vazhdojë të ulet. Një fakt tjetër shqetësues është se në Bullgari, si dhe në vendet e tjera evropiane, po vëzhgohet plakja e popullsisë. Analizat e ekspertëve konstatojnë se bullgarët e rinj hyjnë në tregun e punës në një moshë më të vonshme, në krahasim me të rinjtë e vendeve të tjera anëtare të bashkësisë dhe në shumicën e rasteve nuk kanë marrë përvojë praktike pasi kanë mbaruar arsimin e tyre.

Si mundësi për përballimin e këtyre proceseve negative qeveria ka parashikuar përmirësimin e cilësisë së arsimit të mesëm dhe të lartë, inkurajim të kualifikimit gjatë tërë jetës, si dhe sigurimin e më shumë stazheve dhe përforcimin e lidhjes midis biznesit dhe arsimit. Shteti ka në plan të stimulojë interesin studiues të nxënësve dhe studentëve nëpërmjet pjesëmarrjes së tyre në projekte të ndryshme shkencore. Parashikohet gjithashtu përkrahje për ndërmarrjet, të cilat sigurojnë vende pune për të rinjtë, sidomos në vendbanimet e vogla dhe në rajonet fshatare. Do të stimulohet dhe zhvillimi i specialistëve të rinj në administratën shtetërore dhe bashkiake. Do të krijohet dhe e ashtuquajtura “pistë e shpejtë” për rritjen në karrierë të nëpunësve të rinj, të cilët kanë demonstruar veti të jashtëzakonshme në zbatimin e detyrave të tyre në punë. Të rinjtë me suksese në fushën e inovacioneve gjithashtu do të inkurajohen dhe do të ndihmohen ata, të cilët dëshirojnë të fillojnë biznes privat me teknologji të larta.

Që t’i ndihmojë familjet e reja dhe mundësitë për zhvillim në karrierë, shteti parashikon gjithashtu rritje të vendeve të lira në kopshtet për fëmijë. Strategjia parashikon mundësi për inkurajimin e të rinjve në vendbanimet e vogla, duke u siguruar mundësi për realizim profesional.

Dokumenti i ri është gjithashtu instrument për stimulimin e aftësive krijuesve të të rinjve dhe për përfshirjen e tyre më aktive në jetën shoqërore dhe politike të vendit. Të dhënat e studimeve të ndryshme tregojnë se gjithnjë e më shumë rritet përqindja e bullgarëve të rinj, të cilët nuk interesohen aspak për politikë. Në qoftë se në vitin 1998 ata ishin rreth 30 për qind, aktualisht të rinjtë indiferentë për politikën janë mbi 60 për qind. Përkrahja ndaj organizatave rinore, trajnimi i liderëve të rinj, krijimi i këshillave rinorë, të cilat të përfaqësojnë interesat e të rinjve në realizimin e politikave të nivelit vendor dhe shtetëror, të gjitha këto janë pjesë e masave në drejtim të zgjidhjes së këtij problemi.

Veprime konkrete në kuadrin e strategjisë do të financohen me mjete nga buxhetet shtetërore dhe bashkiake, nëpërmjet programit të BE-së “Rinia në veprim”, si dhe me mjete nga fondet evropiane. Në strategji është parashikuar gjithashtu përmirësim i mundësive të organizatave rinore për tërheqjen e resurseve të jashtme financiare për përpunimin dhe administrimin e projekteve.

Përgatiti në shqip: Vesella Mançeva

По публикацията работи: Rumjana Cvetkova

Последвайте ни и в Google News Showcase, за да научите най-важното от деня!

Ndaje

Inkurajimi i të rinjve në zgjedhjen e rrugës së tyre profesionale – një prej qëllimeve të Strategjisë kombëtare për rininë

Më shumë nga rubrika

Tirana njoftoi të dhëna zyrtare të përditësuara për bullgarët në Shqipëri

Gjysma e diabetikëve në Bullgari nuk janë diagnostikuar dhe konsiderohen të shëndetshëm

Si do të ndikojë zgjedhja e Donald Trump në Evropë dhe në siguri, në mbrojtje dhe ekonomi?

Elegjia për Krahinat Perëndimore tingëllon si një requiem

Nuk ka qartësi se cila pjesë e trashëgimisë kulturore bullgare në Ukrainë është ruajtur për brezat e rinj

A do të çojë në një sulm bërthamor vendimi i SHBA-ve për të lejuar Ukrainën të godasë objektiva brenda Rusisë me armë të tyre?