Para pak kohe në sallën e Klubit Ushtarak në Sofje, në kuadrin e edicionit të gjashtë të festivalit ndërkombëtar “Piano Ekstravaganca”, dy studentë bullgarë, paraqitën koncertin për piano “Laureatë”. Këta janë Stefan Bonev dhe Georgi Bojkin, mbajtësit e çmimeve speciale të Konkursit Ndërkombëtar për Pianistë dhe Violinistë “Panço Vladigerov” gjatë 2015-ës. Ata interpretuan në mënyrë të shkëlqyeshme dhe sipas këndvështrimit të tyre veprat e Johanes Sebastian Bahut, Moris Ravelit dhe Sergej Rahmaninovit. Ata i bënë përshtypje të madhe publikut dhe treguan edhe një herë se “Piano Ekstravaganca” është forumi, ku çdo vit paraqiten interpretuesit më të mirë të muzikës për piano.

“I jam shumë mirënjohës prof. Angellovit (profesor Ljudmill Angellov është pianist dhe krijuesi i Festivalit “Piano Ekstravaganca”), i cili më ftoi mua dhe Stefan Bonevin pas konkursit “Panço Vlladigerov 2015”, ku ne të dy fituam çmimin e këtij forumi. Ky është një prej festivaleve më prestigjioze për piano, të cilat zhvillohen në Bullgari. Të paraqitesh në këtë festival dhe t’i biesh një vegle muzikore të klasës së lartë, kjo ndodh rrallë.”

Për pikëpamjen e vet dhe për interpretimin origjinal të veprave të Bahut Bojkin shton: “Gjithnjë e më pak njerëz mendojnë se kjo muzikë i përket vetëm organit, ose çembalos, ose ansambleve të harqeve dhe unë jam një prej tyre. Kjo muzikë mund të ekzekutohet nga çdo një vegël muzikore me sukses të madh, sepse kjo është një muzikë shumë e pastër dhe është kompozuar nga ky gjeni për të gjithë njerëzit. Ajo nuk duhet të ekzekutohet vetëm në kishë, ose në sallën e dhomës. Ndërkaq, pianoja jep mundësi të mëdha. Gjatë ekzekutimit të kësaj muzike duhet të kemi parasysh atë që e kanë bërë ansamblet e Barokut, domethënë mënyrën në të cilën muzika interpretohet në “Suitat” për orkestër, ose në “Koncertet e Brandenburgut”. Ky është edhe qëllimi im, duke luajtur në piano.”

Pianisti Stefan Bonev, mbajtës i dy çmimeve të posaçme të konkursit “Panço Vlladigerov” për interpretimin e veprave të Bahut dhe Vlladigerovit, ishte më lakonik, por më konkret:

“Megjithëse zhvillohet për herë të gjashtë, festivali tashmë ka fituar popullaritet edhe jashtë shtetit. Në Hamburg, ku unë banoj dhe jam duke i bërë studimet, jeta kulturore e Bullgarisë nuk është shumë e njohur, por ka mjaftë njerëz, të cilët kanë dëgjuar për këtë forum. Së pari, sepse është organizuar nga pianisti i njohur bullgar Ljudmill Angellov dhe së dyti – sepse atje interpretohet muzikë më e ndryshme në krahasim me festivalet e ndryshme – kryesisht muzikë moderne dhe vepra të kompozitorëve më pak të njohur. Ne, bashkë me Georgi Bojkinin zgjodhëm një program më klasik.”

Përgatiti në shqip: Vesella Mançeva