E nominuara nga GERB për kryeministre, Maria Gabriel, mori sot nga presidenti Rumen Radev mandatin eksplorues për formimin e qeverisë. Pas takimit me presidentin ajo deklaroi se do ta mbajë mandatin e kabinetit që i është dorëzuar, por për të është e papranueshme pritja e afatit shtatëditor të përcaktuar në Kushtetutë për kthimin e mandatit. Sipas fjalëve të saj, negociatat mes GERB-SDS dhe "Po e vazhdojmë ndryshimin" - "Bullgaria Demokratike" (PP-DB) për kabinetin qeveritar do të vazhdojnë akoma 24 orë, pasi PP-DB ka kërkuar edhe pak kohë për negociata. Në maratonën e ardhshme të negociatave 24-orëshe do të shqyrtohet nënshkrimi i një marrëveshjeje koalicioni dhe saktësimi i përbërjes së një qeverie.

Më pas, në një mesazh për media, GERB vuri në dukje se negociatat me PP-DB do të finalizohen deri në orën 12:00 të datës 19 mars. Kandidatja e GERB-it për kryeministre, Maria Gabriel, do të shkojë të martën te presidenti Rumen Radev me vendimin përfundimtar.

Gabriel shkoi në Presidencë me ish-kryeministrin nga PP-DB Nikollaj Denkov. Kryeministri në dorëheqje komentoi një listë jozyrtare të ministrave nga kabineti i mundshëm i ardhshëm në media, duke thënë se PP-DB e ka parë që sot dhe se ajo përmban emra të papranueshëm për PP-DB. Sipas listës, në mesin e ministrave të zëvendësuar është edhe ministri i mbrojtjes Todor Tagarev, në vend të të cilit është propozuar Hristo Gaxhev (GERB). Në të njëjtën kohë, ministri i financave Asen Vasilev (bashkëkryetar i PP) ruan postin e tij.

• Rotacioni në qeveri është i dyshimtë
  

• A do të gjendet një formulë për qeverisjen në Bullgari?