Presidenti aktual i Kroacisë, Zoran Milanoviç, i cili është kandidat i Partisë Social Demokrate të opozitës, fitoi raundin e parë të zgjedhjeve presidenciale të vendit më 29 dhjetor me 49.09% të votave. Më 12 janar, ai do të përballet në raundin e dytë kundër kandidatit të pavarur Dragan Primorac, i mbështetur nga partia qeverisëse e Unionit Demokratik Kroat. Me një pjesëmarrje të vozuesve prej 46.03%, Primorac fitoi 19.35% të votave. Në raundin e parë garuan gjithsej 8 kandidatë. Mediat kroate e cilësuan rezultatin e Zoran Milanoviçit si triumf dhe e krahasuan me fitoren e ish-presidentit Stipe Mesic në vitin 2005, transmeton BTA. Sipas analistëve, nuk ka pothuajse asnjë shans që rezultati i raundit të dytë të përmbyset.

Pagat e punonjësve buxhetorë në Rumani, shuma e shpërblimeve, përfitimeve dhe kompensimeve, si dhe pensionet do të mbeten të ngrira në vitin 2025 në nivelin e nëntorit 2024, raportoi agerpres.ro. Orët shtesë jashtë orarit të punës nuk do të paguhen, por do të kompensohen me ditë pushimi. Rumania ka rreth 5.5 milionë të punësuar. Nga këto, 1.3 milionë janë nëpunës civilë, thekson Digi24. Në të njëjtën kohë nga fillimi i vitit 2025 Rumania kaloi në pagën minimale evropiane prej 822 euro, për të cilën do të punojnë më shumë se 1.8 milionë punonjës të sektorit publik dhe privat në muaj. Qëllimi i qeverisë është të mbajë deficitin buxhetor brenda 7% të PBB-së së vendit, raportoi Euronews.

Turqia shpalli një plan për zhvillimin rajonal me vlerë 14 miliardë dollarë. Qëllimi i Ankarasë është të zvogëlojë ndryshimet ekonomike midis rajonit juglindor me mbizotërim kurd dhe pjesës tjetër të vendit. Njoftimi vjen në sfondin e shpresave në rritje për një fund të kryengritjes dhjetëvjeçare të Partisë së Punëtorëve të Kurdistanit (PKK) në Turqinë juglindore, si dhe shfaqjes së një lidershipi të ri në Sirinë fqinje që ka lidhje të ngushta me Ankaranë. Qarqet lindore dhe juglindore të Turqisë kanë mbetur prej kohësh prapa rajoneve të tjera të vendit në shumicën e treguesve ekonomikë.

Ministri i Industrisë Fatih Kacir tha në qytetin juglindor Şanliurfa se qeveria do të shpenzojë një total prej 496.2 miliardë lira për 198 projekte rajonale në periudhën deri në vitin 2028, raporton BGNES.

Komisioni Qendror i Zgjedhjeve (KQZ) i Kosovës ka vendosur që partia më e madhe e serbëve të Kosovës, "Lista Serbe", të marrë pjesë në zgjedhjet parlamentare në Kosovë më 9 shkurt, raporton kosovapress.com. Më herët, Gjykata Supreme e Kosovës refuzoi ankesën e partisë në pushtet, "Lëvizja Vetëvendosje". Më 23 dhjetor, KQZ-ja ndaloi pjesëmarrjen e formacionit serb në zgjedhjet parlamentare, duke përmendur qëndrimin nacionalist të partisë dhe lidhjet e ngushta me Beogradin. Ky vendim u kritikua nga aleatët perëndimorë të Prishtinës dhe Gjykata Supreme hodhi poshtë argumentet e Vetëvendosjes se “Lista Serbe” nuk duhet të miratohet për zgjedhjet parlamentare për shkak se partia nuk e njeh shtetësinë e Kosovës dhe vazhdon ta quajë atë një krahinë autonome serbe "Kosova dhe Metohia".

Varësia ndaj internetit është një problem që e shohim të gjithë, por deri më tani nuk kemi mundur të gjejmë politika për ta zgjidhur atë, tha kryeministri grek Kyriakos Mitsotakis. Ai ka prezantuar strategjinë kombëtare për mbrojtjen e të miturve nga ky keqpërdorim, raporton ANA-MPA. Gjithashtu u aktivizua faqja parco.gov.gr me informacione të rëndësishme për prindërit se si të kontrollojnë përdorimin e internetit nga fëmijët e tyre. Sipas kryeministrit, ndalimet e plota nuk kanë gjasa të jenë efektive dhe u bëri thirrje kompanive të mbajnë përgjegjësinë sepse përdorin algoritme që maksimizojnë kohën e ekranit. Që nga pranvera shteti ka prezantuar aplikacionin “Kids wallet” për vërtetimin efektiv të moshës së përdoruesit. Mitsotakis shpreson që aplikacioni të përdoret edhe në nivel evropian.

Përpiloi: Ivo Ivanov

Foto: AP/BTA, romania-insider.com, REUTERS, Facebook/Srpska lista, greekcitytimes.com

Përgatiti në shqip dhe publikoi: Kostandina Bello