"Doja të vizitoja Vjenën sepse për mua ishte një qendër botërore e muzikës. Aplikova në Shkollën e Lartë të Muzikës dhe Arteve Skenike, që tani është Universiteti i Muzikës (Musikhochschule in Wien). Më pranuan në klasën e profesor Josef Sivo (pedagog dhe solist i shquar, koncertmjeshtër i Filarmonisë së Vjenës) dhe kështu filloi jeta ime në kryeqytetin austriak. Vazhdova shkollimin në Konservatorin e Vjenës (Konservatorium der Stadt Wien) te prof. Alexander Arenkov. Fitova një konkurs për të qenë pjesë e Tonkünstler-Orchester – orkestrën e Austrisë së Poshtme. Punova atje për 10 vjet. U largova sepse ndërkohë kisha fituar një vend në orkestrën e Operës Shtetërore të Vjenës (Wiener Staatsoper). Unë isha një nga dy violinistet e para të lejuara të luaja në këtë orkestër. Aty punova tre vjet, më pas u bëra pjesë e Orkestrës Bruckner në Linz, në pozicionin e udhëheqësit të violinës së parë (Stimmführerin 1. Violine) me detyrat e një koncertmjeshtri – në këtë pozicion jam edhe sot e kësaj dite”.

"Programi ynë është shumë i pasur. Ai përfshin vepra absolutisht nga të gjitha zhanret", thotë violinistja bullgare. "Simfonitë e Brucknerit janë pothuajse Bibla jonë, ne i luajmë vazhdimisht në absolutisht të gjitha versionet. Gjithashtu simfonitë e Mahler, Çajkovskit, Rachmaninoff. Dirigjenti Markus Poschner është një muzikant i jashtëzakonshëm. Ai solli shumë ide të reja. Mendoj se nën drejtimin e tij orkestra është rritur shumë."

Iva Hölzl është gjithashtu një soliste aktive dhe muzikante dhome. Në vitin 2023 ajo pati një recital në një nga sallat e Musikverein. Kjo ishte performanca e saj e parë solo në kompleksin e famshëm muzikor, por ajo shprehet se si anëtare e orkestrës nga viti 2004 deri në 2007, ajo fjalë për fjalë ka jetuar në sallën ikonike vjeneze. Repertori i saj është mbresëlënës: nga Bach deri te Schnittke, nga Paganini te Bartok dhe Webern. Bashkëpunimi me kompozitorë bashkëkohorë si Erich Urbaner, Vladimir Panchev, Rumen Balyozov dhe Ivan Eryod e kanë pasuruar atë. Tudor Saveanu, Michael Amann dhe burri i saj Wolfgang Hölzl shkruajnë veçanërisht për të, ndërsa në vitin 2001 kompozitori dhe violinisti Andreas Baksa krijoi një koncert violine për të talentuarën Iva.


Një nga kthimet e mëparshme të Ivës në atdheun e saj ishte si pjesë e Vogl String Trio. A ekziston edhe sot treshja?

"Aktualisht është në qetësi, por nuk është shpërbërë, ne i ruajmë kontaktet. Dëgjohemi shpesh me Elissaveta Staneva-Vogl dhe po mendojmë se çfarë pjesë të reja mund të mësojmë, trio të reja, si mund të vazhdojë krijimi ynë i përbashkët muzikor."

Edhe violistja Elissaveta Staneva-Vogl është bullgare. Së bashku me bashkëshortin e saj, violonçelistin Bernhard Vogl dhe Iva Nikolovën, ata formuan Vogl String Trio, e cila publikoi një CD shumë interesante me muzikë të Max Reger. Por gjithsesi, aktiviteti kryesor i Ivës është në Orkestrën Bruckner. Ndërkohë kompozitori Bruckner gjithashtu luajti një rol të rëndësishëm në jetën e saj personale, sepse ai e bashkoi atë së bashku me burrin e saj, muzikologun dhe kompozitorin Wolfgang Hölzl.

“Po, doli diçka interesante”, kujton Iva Nikolova për takimin e tyre. “Meqenëse im shoq kishte shkruar një libër për Simfoninë e Shtatë të Bruckner-it – një libër analitik, më thirri për të shkëmbyer informacione dhe për të më pyetur për disa përshtypje, thjesht si interpretuese”.

E pyetur se kur mund ta presim sërish në Bullgari, Iva Hölzl-Nikolova përgjigjet se ka mundësi që ta shohim dhe ta dëgjojmë këtë verë në festivalin Sofia Music Weeks. Ndërkohë Iva shprehet se është e lumtur se ka shumë bullgarë të shquar në Vjenë dhe muzikantët bullgarë gëzojnë karriera të suksesshme.

Foto: ivahoelzlnikolova.at, brucknerhaus.at, haus-hofmannsthal.jimdofree.com

Përgatiti në shqip dhe publikoi: Kostandina Bello