Filmi bullgar "Dita kur ajo do të lindë", me regji dhe skenar nga Emil Spahijski (në bashkautorësi me regjisorin rumun Bogdan Mureshanu), i bazuar në tregimin me të njëjtin titull nga shkrimtarja Jordanka Beleva, fitoi Çmimin e Publikut në edicionin e 12-të të Festivalit Ndërkombëtar të Filmit të Shkurtër KO:SH Film Fest në Korçë, të Shqipërisë Juglindore.

Lajmin e bëri të ditur ambasadori i Bullgarisë në Republikën e Shqipërisë, Ivajllo Kirov, me një postim në Facebook, ku shprehu krenarinë e tij për faktin se, për herë të parë në historinë e festivalit, Çmimi i Publikut i jepet një produksioni jo-shqiptar. "Me mbështetjen e afro 64% të votave të publikut, kjo fitore është një dëshmi për fuqinë e kinemasë bullgare për të emocionuar dhe prekur zemrat e publikut përtej kufijve" – shkruan Ivajllo Kirov dhe përgëzon të gjithë ekipin e filmit. “Kjo arritje është një frymëzim dhe një shembull i ndritshëm i dialogut të suksesshëm kulturor mes dy vendeve tona... Për ne ishte një nder të mbështesim pjesëmarrjen e fuqishme bullgare në festivalin e sivjetshëm, ku Bullgaria ishte vend në fokus përmes përzgjedhjes së posaçme të përgatitur nga Festivali Ndërkombëtar i Filmit të Shkurtër IN THE PALACE” – shkruan ambasadori.

“Dita kur ajo do të lindë” është një histori për Martën – një grua e moshuar që humb kontaktin me realitetin për shkak të demencës. Në kujtimet e saj, ajo gjen forcë dhe dashuri që i tejkalojnë sëmundjen dhe i rikujtojnë asaj se, edhe në sprovat më të rënda, dashuria mbetet shpëtimi ynë.

Redaktoi: Krasimir Martinov

Përgatiti në shqip dhe publikoi: Svetllana Dimitrova