SHBA as nuk i inkurajoi, as ndihmoi ukrainasit për të kryer sulme në territorin e Rusisë, tha Sekretari i Shtetit Anthony Blinken pas sulmeve kundër aeroporteve strategjike ruse. Ai ripohoi vendosmërinë e Uashingtonit për të siguruar që Kievi të ketë pajisjet që i nevojiten për t’u mbrojtur, njoftoi Reuters.

SHBA nuk po e ndalon Ukrainën të zhvillojë potencialin e vet të goditjeve me rreze të gjatë, tha Sekretari i Mbrojtjes i SHBA-së, Lloyd Austin.

Kongresi amerikan ra dakord t’i sigurojë Ukrainës ndihmë shtesë prej të paktën 800 milionë dollarësh në vitin 2023. Kjo u votua përmes ligjit të buxhetit të mbrojtjes që arrin në 858 miliardë dollarë.

Ministria e Shëndetësisë e Ukrainës njoftoi se u kërkoi zyrtarëve të saj rajonalë që të mendojnë pezullimin e përkohshëm të operacioneve të planifikuara derisa situata e furnizimit me energji elektrike të stabilizohet, njoftoi Reuters. Spitalet do të vazhdojnë të ofrojnë kujdes urgjent. Operatori shtetëror i Ukrainës “Ukrenergo” tha se i duheshin disa ditë të tjera për të rifilluar prodhimin e energjisë elektrike në nivelet para sulmeve ruse të 5 dhjetorit.