Fillimi i vitit 2025 është më se i frytshëm për këngëtaren Desi Dobreva – krahas udhëtimeve nëpër botë, ajo arriti të incizojë një këngë të dytë. Pas këngës së saj prej autori “Në fund të Tokës”, erdhi dhe incizimi i këngës popullore nga fshati Pirin “O moj rini e shkretë”. Ajo do të jetë pjesë e albumit “E pashme”, të cilin këngëtarja tashmë po e përgatit. Desi e njeh këngën prej shumë vitesh, por pasi shikoi filmin "Letër nga Amerika" të regjisores Iglika Trifonova, ajo ishte aq e impresionuar, se e dinte që do të vinte koha e duhur dhe ajo do ta bënte atë në mënyrën e saj. Ajo pranon se kënga bëri një rrugë të gjatë, se ajo kishte mijëra ide dhe në fund zgjodhi këtë version të veçantë – ja pse:

"Ky version është një përzierje e shumë zhanreve dhe stileve - një eklektikë, sepse jeta, mënyra se si e jetojmë dhe bota në të cilën jetojmë, është në fakt një kaos absolut dhe një përzierje eklektike e gjithçkaje. Globalizim i plotë, në të cilin ne kërkojmë tonën, apo lokalen, që na bën të ndryshëm dhe interesantë. Ndoshta kjo është pikërisht ajo që synoj me gjithë punën time – në një farë mënyre të jemi ndryshe, por në të njëjtën kohë të përshtatemi me shoqërinë dhe botën moderne. Kjo është një këngë shumë e shenjtë. Doja të filloja pa shoqërimin e instrumenteve muzikore për të treguar thellësinë e vetë melodisë dhe bukurinë e tekstit.”

Për Desi Dobreva kjo këngë është e shenjtë - është një këngë shumë e vjetër arkaike bullgare dhe këngëtarja shpreson që me këtë tingëllim kënga “O moj rini e shkretë” të qëndrojë më gjatë në skenë dhe të dëgjohet nga të rinjtë që nuk e njohin folklorin e tyre vendas.

Sipas legjendës kjo është një këngë shëruese dhe është pjesë e një rituali. Sipas këngëtares, pikërisht ky është folklori autentik – kur muzika dhe teksti janë pjesë e një procesi ritual. Në këtë rast, procesi është "yshtje" – teksti i këngës është një namatisje që përdoret për të trajtuar njerëzit jo vetëm për sëmundje, por edhe për humbje shpirtërore, madje edhe mendore, me shpresën se do të kthehen në rrugën e duhur. Këngëtarja është e bindur se folklori bullgar ka fuqi të jashtëzakonshme, përfshirë këtu dhe shërimi.

Lexoni më shumë nga arkivi i Radio Bullgarisë:

Përgatiti në shqip dhe publikoi: Svetllana Dimitrova